دليل فيتامين محاسبة لمحاسب المطعم الجديد
كيف تمسك مطعم بدون خسائر… وبدون ما يضحك عليك حد
لو داخل تشتغل محاسب في مطعم… لازم تفهم الحقيقة دي:
المطعم مش دفتر قيود… المطعم مصنع فلوس سريع التسريب، واللي مش فاهم التشغيل… عمره ما هيفهم الحسابات.
الجزء الأول: افهم الإيراد قبل ما تحسب الربح
أول غلطة بيقع فيها محاسب المطاعم إنه يشوف رقم مبيعات كبير ويقول “الدنيا حلوة”… لكن المحاسب المدقدق يسأل: جت منين؟
- (1) حسب مصدر الإيراد: صالة داخلية (Dine in) / تيك أواي / دليفري / مشروبات داخلية وخارجية.
- (2) حسب نوع العميل: كاش / طلبات جماعية / شيفت صباحي / شيفت مسائي.
- (3) حسب نوع المنتج: مشويات / أكل سخن / أكل بارد / طواجن / حلويات / مشروبات.
🎯 المطلوب منك: تقرير أكثر صنف يبيع، أكثر صنف يكسب، وأقل صنف ربح (لازم يتراجع أو يتشال).
⚠ قاعدة فيتامين محاسبة الذهبية: المبيعات العالية مش معناها ربح عالي.
الجزء الثاني: أهم مهارة — حساب تكلفة الوجبة (Recipe Cost)
لو مش عارف تكلفة كل وجبة… يبقى أنت مجرد “مسجل فواتير”.
1. الطريقة الاحترافية (الأدق): تحديد كل مكون بالجرام وتسعيره وحساب تكلفة الطبق بدقة.
2. الطريقة العملية (العادية): حساب تكلفة فئة الأكل (مشويات / سخن / بارد).
المطلوب: عمل ملف Recipe Cost، تحديد Food Cost %، والمقارنة بين التكلفة وسعر البيع وهامش الربح.
⚠ تحذير مهني: الشيف مش عدوك… لكن هيتحول لأكبر مصدر نزيف لو مش متراقب.
ونصيحة شخصية مني وعلي مسئوليتي انا أكرم ممدوح: لا تأكل أي وجبة غير رسمية من الشيف لأنك كده كسرت حيادك المهني وزرعت اول مسمار في هز ثقتك عند صاحب المطعم اصل لو اكلت البطن تستحي العين و ساعتها مش هتعرف تشوف شغل الرقابي صح.
الشيف المحترف يوديك و يجيبك زي السكينة في الحلاوة فاساس الشغل انك تكون عارف الريسيبي بتاع الاكلات عشان يبقي عندك ارض ثابتة تتكلم منها ثم تتفق علي نسبة انحراف مع صاحب المطعم يرتضيها والشيف يحوم حواليها بالسموح، ههههه.
الجزء الثالث: الجرد — أهم شغل يومي للمحاسب
المطعم يخسر من: المخزن + المطبخ + الاستهلاك
- لازم تعمل: جرد يومي / جرد لكل شيفت / مقارنة (رصيد أول + وارد – منصرف = رصيد فعلي).
- دورك في الاستلام: تحضر تسليم المخزن للمطبخ، تراجع فواتير الشراء وكميات الاستهلاك.
- تقسيم المخازن: خامات (بدروم) / تحت التشغيل (المطبخ) / بضاعة تامة (الثلاجات).
⚠ قاعدة ذهبية: اللي يشتري ≠ أمين المخزن (فصل مهام = منع سرقة).
الجزء الرابع: مصاريف التشغيل
بعد الأكل… المصاريف هي اللي بتاكل الربح. قسم مصاريفك لـ (أجور) و (مصروفات عمومية وصيانة ودعاية).
الجزء الخامس: التقارير اللي لازم تطلعها
أي محاسب محترف لازم يطلع تقارير: المبيعات حسب النوع والشيفت، Food Cost %، الهالك والتالف، الجرد والانحرافات، وقائمة دخل تشغيلية.
الجزء السادس: أخطاء تدمر المحاسب الجديد
❌ الاعتماد على كلام الشيف بدون أرقام / ❌ عدم حضور الجرد / ❌ عدم فهم التشغيل / ❌ التركيز على الدفاتر وترك المخزن / ❌ الأكل والشرب من غير تسجيل / ❌ عدم فصل المهام.
خلاصة فيتامين محاسبة:
محاسب المطعم الناجح لازم يكون فاهم تشغيل، مطبخ، مخزون، تكلفة، وفاهم تسريب الربح. لو ضبطت الإيراد + الريسيبي + الجرد + المصاريف هتمسك أي مطعم… حتى لو أول شغل ليك.
فيتامين محاسبة
#فيتامينات_محاسبية_مع_اكرم_ممدوح