تكاليف عنبر دواجن مفتوح
تاريخ النشر: 2026/6/4
يا باشمحاسب… 🐥
سواء إنت فريش لسه طالع من الكلية 🎓 أو خبرة 8-10 سنين 💼 أو مدير مالي 👔 —
في قطاع الدواجن، في سؤال بيتكرر كل يوم تقريباً:
“التكاليف بتاعة العنبر المفتوح… بتحسبها إزاي بالظبط؟”
🔴 المشكلة:
معظم المحاسبين اللي بيشتغلوا في مزارع الدواجن 🐓 بيحسبوا التكاليف كلها في آخر الدورة — يعني لما الكتكوت يوصل للذبيحة — وبعدين بيتفاجئوا إن الأرقام مش ماشية مع بعض، ومش عارفين فين راح الفلوس بالظبط!
ده مش تقصير، ده غياب في فهم الدورة من أول يوم لآخر يوم.
🟢 الدواء — تعالي نشرح دورة التكلفة من الكتكوت للفرخة خطوة بخطوة:
1️⃣ تكاليف الإعداد والتجهيز (قبل ما الكتكوت يدخل العنبر)
دي تكاليف مش بياخد باله منها كتير من المحاسبين الفريش.
تشمل:
- تعقيم وتنظيف العنبر
- فرش النشارة أو القش (الفرشة)
- تجهيز التدفئة والإضاءة والمعدات
لو العنبر طوله 100 متر — متوسط تكلفة التجهيز بيتراوح من 3,000 لـ 7,000 جنيه للعنبر الواحد قبل ما الكتكوت يدخل خالص.
دي تكاليف مباشرة تُضاف لتكلفة الدورة من اليوم صفر او كمان قبل نزول الكتكوت.
2️⃣ تكلفة الكتكوت (رأس المال الأساسي في الدورة)
(((طبقا لمعيار الأصول الحيوية مصري رقم 35 او دولي IAS 41)))
الكتكوت نفسه تكلفة مخزون — مش مصروف!
لو اشتريت 10,000 كتكوت بسعر 12 جنيه للكتكوت = 120,000 جنيه هي تكلفة المخزون في أول يوم.
ده يُسجَّل في حساب “مخزون إنتاج تحت التشغيل باسم الدورة” — مش في قائمة الدخل — لأن المنتج لسه مكتملش.
بس في السوق الشغل مش بالمعايير لان حجم العمل وكفاءة المحاسبين مش بتساعد انك تشتغل وتعمل قيود من المخزون السلعي لمخزون تحت التشغيل ثم تكاليف انتاج قائمة دخل.
في السوق وشغل المزارع الصغيرة و المتوسطة بيتم تجميع تكاليف العنبر في حساب تكاليف العنابر باسم الدورة او تاريخها لكل بند منفصل بقيد منصرف من المخزون:
120,000 من ح/ تكاليف العنابر (دورة كذا)
120,000 الي ح/ مخزون سلعي
(((خد بالك معايا قد المعايير مهمة في حياة المحاسب لانها بتعرض حقيقة النشاط في لحظته لكن التطبيق في الواقع بيبقي ليه تحديات شوية)))
3️⃣ تكاليف التغذية (أكبر بند في الدورة كلها)
العلف بيمثل من 65% لـ 75% من إجمالي تكلفة الدورة.
لازم تتابع:
- كمية العلف اللي دخلت العنبر كل أسبوع
- سعر الطن في تاريخ الشراء (مبدأ التكلفة التاريخية — مش سعر السوق الحالي)
- الفارق بين العلف اللي دخل والوزن اللي اتحقق = معامل التحويل الغذائي
لو معامل التحويل عندك 1.9 وفي العنبر التاني 1.6 — في مشكلة في الإدارة أو الصحة — مش في المحاسبة بس.
المحاسب الشاطر بيلاحظ الفرق ده ويرفعه للإدارة.
4️⃣ تكاليف الرعاية البيطرية والأدوية
دي تكاليف متغيرة بتختلف من دورة لدورة. بتشمل: لقاحات، مضادات حيوية، فيتامينات، أجر الطبيب البيطري.
مهم: أي دواء اشتريته ومستخدمش في الدورة دي — لازم يتسجل “مخزون متبقي” مش مصروف في الدورة الحالية.
5️⃣ تكاليف التشغيل الثابتة والمتغيرة
الثابتة: إيجار الأرض أو إهلاك العنبر، مرتبات العمال الدائمين.
المتغيرة: كهرباء (خصوصاً في الشتا مع التدفئة)، مياه، عمالة مؤقتة للتحميل.
6️⃣ النافق — وكيف تعاملها محاسبياً
ده البند اللي بيوقع فيه كتير!
- لو نسبة النافق أقل من 4% — ده في الحدود الطبيعية وبيُعامَل كـ تكلفة إنتاج عادية تُوزَّع على باقي الطيور.
- لو النافق فوق 4% — لازم يُدرس السبب وجزء منه ممكن يتعامل كـ خسارة غير عادية وتظهر بشكل منفصل في القوائم.
وطبعا ده لازم يتعمله تقييم (تكلفة الكتكوت في عدد النافق، والأهم بقي ان لازم يكون عندك حصر يومي بالنافق).
بس هل ده بيحصل في الواقع، هل ثقافة مشرف الدورة مستوعبة أهمية حصر النافق ولا بيضرب النافق في المسروق؟
صحصح يا محاسب وركز في المعدلات وبلغ الإدارة عشان تراجع أداء المربيين والمشرفين علي الدورات.. الفرق ده مهم جداً في المراجعة الخارجية.
7️⃣ تكلفة الفراخ النهائية = تكلفة الوحدة المنتجة
في نهاية الدورة (عادة من 35 لـ 42 يوم في الدواجن البيضاء):
تكلفة الكيلو الحي =
(إجمالي تكاليف الدورة كلها) ÷ (إجمالي الوزن الحي عند البيع بالكيلو)
مثال بسيط:
- إجمالي تكاليف الدورة: 850,000 جنيه
- إجمالي الوزن الحي: 25,000 كيلو
- تكلفة الكيلو = 34 جنيه
لو سعر البيع 37 جنيه — الهامش 3 جنيه للكيلو — يعني هامش الربح حوالي 8.1%
شايف الفرق؟ 💡
المحاسب اللي بيفهم دورة التكلفة دي من اليوم صفر لآخر يوم — هو اللي بيقدر يقول لصاحب المزرعة: “الدورة دي ربحت ولا خسرت وليه بالظبط.”
لا وكمان يعرض هي ربحت ليه وخسرت ليه.
مش بس بيسجل أرقام — هو بيساعد في قرارات تشغيلية حقيقية.