IFRS 18 للمدير المالي:
نفس الأرقام.. قصة مختلفة
المعيار الجديد لعرض قائمة الدخل مش تعديل شكل في آخر السنة.. ده قرار إدارة بيتاخد النهارده، وأثره بيوصل لعقود البنوك ومؤشرات الأداء وحوافز الإدارة.
الخلاصة في دقيقة
- IFRS 18 (Presentation and Disclosure in Financial Statements) بيحل محل IAS 1، وبيسري إلزامياً على السنوات المالية اللي بتبدأ من 1-1-2027.
- السنة اللي إحنا فيها دلوقتي (2026) هي سنة المقارنة — يعني أرقامها هتتعاد وتتعرض بالشكل الجديد. أنت عملياً جوّه المعيار من أول يناير اللي فات.
- قائمة الدخل بقت 3 فئات رئيسية (تشغيلي / استثماري / تمويلي) + مجموعين فرعيين إلزاميين: الربح التشغيلي والربح قبل التمويل والضرائب.
- مؤشرات الإدارة اللي بتعلنها للبنوك والمستثمرين (زي “الربح المعدَّل”) بقت داخل الإيضاحات وتحت مراجعة مراقب الحسابات.
- صافي الربح مش هيتغير.. لكن “الربح التشغيلي” ممكن يتغير — وده بالظبط الرقم اللي عقود القروض والحوافز مربوطة بيه.
ليه ده مش “تغيير مسميات”؟
أول رد فعل عند ناس كتير: “هنغيّر ترتيب البنود في القائمة وخلاص”. المشكلة إن القائمة النهائية هي قمة جبل الجليد (Tip of the iceberg) — والشغل الحقيقي تحت السطح، في الأنظمة وشجرة الحسابات وطريقة تسجيل القيد من أول يوم.
- إعادة بناء شجرة الحسابات (Chart of Accounts)
- تعديل نظام الـ ERP (نظام تخطيط الموارد)
- ربط فروق العملة بأصل المعاملة
- فصل المحقق عن غير المحقق من الأرباح والخسائر
- إعادة تبويب سنة المقارنة 2026 كاملة (سنوي وربع سنوي)
- ضوابط رقابة داخلية على مؤشرات الإدارة
- تحليل المصروفات بالطبيعة والوظيفة مع بعض
- تدريب الفريق على منطق التصنيف الجديد
والغموض ليه وشّين: دمج مُخل بيضيّع المعنى (بنود مختلفة متجمعة في رقم واحد)، وتفاصيل مفرطة ومبعثرة بتتوّه القارئ. عشان كده المعيار حدد دور كل جزء في القوائم:
صلب القوائم = ملخص هيكلي مفيد
أرقام مجمّعة بمنطق واضح، تخلّي القارئ يفهم الصورة الكبيرة في نظرة.الإيضاحات = سرد التفاصيل التحليلية
هنا مكان التفصيل: مكونات “أخرى”، تحليل المصروفات بطبيعتها، تسويات مؤشرات الإدارة.الهيكل الجديد في صورة واحدة
كل بند إيراد أو مصروف لازم يروح لفئة من الفئات دي. الفئة التشغيلية هي “الوعاء المتبقي” — أي بند مش بيحقق شروط الاستثمار أو التمويل بيقعد فيها.
حالتين محتاجين انتباه خاص
1. المؤسسات المالية.. ومعاها “ذراع التقسيط”
في البنوك وشركات التأمين الاستثمار والتمويل هما النشاط الرئيسي، فالفوايد وعوائد الاستثمار بتتسحب من الاستثماري والتمويلي وتتعرض في التشغيلي. الأهم لينا: لو شركتك العادية بتمول عملاءها كنشاط رئيسي (زي البيع بالتقسيط)، فإيراد فوايد التقسيط بيبقى تشغيلي، وعندك اختيار سياسة محاسبية لتصنيف تكلفة التمويل المرتبطة بيه.2. المجموعات: النشاط الرئيسي بيتحدد على مستوى الكيان اللي بيعرض
شركة قابضة نشاطها التصنيع، وعندها تابعة عقارية بتأجر مباني. في قوائم التابعة لوحدها: الإيجار تشغيلي (ده شغلها). في القوائم المجمعة: لو العقارات مش نشاط رئيسي للمجموعة، إيجار العقار الاستثماري ممكن يتصنف استثماري. يعني التجميع مبقاش “جمع أرقام” — بقى تقييم لجوهرية نشاط كل تابعة بالنسبة للمجموعة.قصة “معصرة الجبل الأخضر”: نفس السنة.. قرارين مختلفين
في آخر السنة وقف محمود، المدير المالي لمعصرة الجبل الأخضر للزيتون، قدام مجلس الإدارة شايل قائمتين دخل لنفس السنة: واحدة بالشكل القديم، وواحدة بشكل IFRS 18. نفس الأرقام.. لكن قرارات المجلس اتغيرت.
السنة كانت زحمة:
- خدوا قرض حسن (من غير فوايد) بـ 2 مليون جنيه من أحد الموردين، وسددوا منه مليون خلال السنة.
- عندهم قرض بنكي بالدولار لخط العصر، وبيستوردوا قطع غيار من إيطاليا.
- افتتحوا معرض جديد في القاهرة فيه معصرة صغيرة + مخزن + منطقة تذوق.
- عندهم حصة في شركة تعبئة شقيقة، ومخزن قديم مؤجر للغير، وودائع في البنك.
- طرحوا جزء من أسهمهم في البورصة، ووزعوا 5% من الأرباح على مجلس الإدارة.
السؤال اللي المجلس كان عايز إجابته: أداء المعصرة الحقيقي فين؟ وهل التوسع ناجح؟ شوف القائمة بالطريقتين — نفس القيود، نفس صافي الربح (جنيه):
| البند | العرض القديم (IAS 1) | العرض الجديد (IFRS 18) |
|---|---|---|
| الإيرادات | 10,000,000 | 10,000,000 |
| تكلفة المبيعات | (6,500,000) | (6,500,000) |
| مجمل الربح | 3,500,000 | 3,500,000 |
| مصروفات بيع وتوزيع | (900,000) | (900,000) |
| مصروفات إدارية | (700,000) | (700,000) |
| مصروفات أخرى | (250,000) | (50,000) |
| قضايا عملاء (كانت جوه “أخرى”) | — | (70,000) |
| تكاليف افتتاح معرض القاهرة (كانت جوه “أخرى”) | — | (130,000) |
| فروق عملة (كلها في سطر واحد) | (150,000) | — |
| فروق عملة موردين قطع الغيار | — | (60,000) |
| الربح التشغيلي | 1,500,000 | 1,590,000 |
| نصيب في أرباح شركة التعبئة الشقيقة | 300,000 | 300,000 |
| إيجار المخزن المؤجر للغير | 180,000 | 180,000 |
| عوائد ودائع | 120,000 | 120,000 |
| الربح قبل التمويل والضرائب | — (مش موجود) | 2,190,000 |
| فوايد القرض البنكي | (340,000) | (340,000) |
| الفايدة المحسوبة على القرض الحسن | (60,000) | (60,000) |
| فروق عملة القرض الدولاري | — | (90,000) |
| الربح قبل الضريبة | 1,700,000 | 1,700,000 |
| ضريبة الدخل | (382,500) | (382,500) |
| صافي الربح | 1,317,500 | 1,317,500 |
قراءة المدير المالي للجدول
- الربح التشغيلي زاد 90,000 جنيه (+6%) من غير ما الشركة تكسب جنيه زيادة — لأن فروق عملة القرض خرجت من التشغيل وراحت للتمويل.
- العكس ممكن يحصل عندك: لو كنت بتعرض نصيب الشركة الشقيقة جوه التشغيل، الربح التشغيلي هيقل لما يطلع للاستثماري.
- ظهر رقم جديد تماماً (2,190,000) هيبقى من النهارده جزء من لغة البنوك والمحللين.
- بند “أخرى” نزل من 250,000 لـ 50,000 — والـ 200,000 الباقيين بقوا ظاهرين باسمهم، ومنهم تكلفة معرض القاهرة اللي المجلس كان عايز يشوفها.
- المعرض فضل في التشغيل — لأنه توسّع في النشاط الأساسي نفسه (عصر وبيع زيت)، مش استثمار بيدر عائد مستقل. الجديد إنه بقى ظاهر في سطر لوحده بدل ما يتدفن.
مؤشرات الإدارة (MPMs): من خارج القوائم لداخل المراجعة
مقاييس الأداء المحددة من الإدارة (Management-defined Performance Measures) هي الأرقام اللي بتطلع بيها في العروض ومكالمات المستثمرين وتقرير مجلس الإدارة — زي “الربح التشغيلي المعدَّل” أو “الربح قبل تكاليف إعادة الهيكلة”. زمان كانت برا القوائم ومحدش بيراجعها (Non-GAAP).
عشان تعرف مقياسك واقع فين، بص على هرم المجاميع اللي المعيار بيتعامل معاه:
المقياس بيبقى MPM لما يجتمع فيه التلات شروط دول:
مجموع فرعي إضافي
مش من المجاميع الإلزامية (الربح التشغيلي) ولا المتعارف عليها (مجمل الربح).
إيرادات ناقص مصروفات
رقم منفرد زي “الإيراد” أو مقياس نقدي زي “التدفق النقدي الحر” مش MPM.
مُعلن رسمياً
مستخدم في اتصالات عامة مكتوبة للمستثمرين والسوق، ويعبّر عن رؤية الإدارة للأداء.
لو المقياس حقق الشروط التلاتة، لازم في إيضاح واحد: تعريفه، ليه مفيد، إزاي بيتحسب، وتسوية (Reconciliation) بينه وبين أقرب مجموع فرعي معتمد في المعيار، مع أثر الضريبة وأثر الحقوق غير المسيطرة (NCI) لكل بند تسوية.
| تسوية مقياس “الربح التشغيلي قبل تكاليف افتتاح الفروع” — معصرة الجبل الأخضر | المبلغ | أثر الضريبة 22.5% | أثر NCI |
|---|---|---|---|
| الربح التشغيلي (حسب IFRS 18) | 1,590,000 | ||
| + تكاليف افتتاح معرض القاهرة | 130,000 | (29,250) | 0 |
| الربح التشغيلي قبل تكاليف افتتاح الفروع (MPM) | 1,720,000 |
المطلوب منك كمدير مالي: حصر كل الأرقام اللي خرجت من الإدارة للعالم الخارجي خلال السنة (عروض، تقرير مجلس، بيانات للبورصة)، وتقرر: نكمّل بيها ونبني لها رقابة وتوثيق؟ ولا نبطّلها؟ وخد بالك إن تغيير المقياس أو إيقافه بعد كده محتاج إفصاح بالسبب وإعادة عرض أرقام المقارنة.
ده بالظبط الرقم اللي مجلس المعصرة كان محتاجه عشان يحكم على التوسع: لو المعصرة هتعلنه للبنك أو المستثمرين، بقى MPM وتحت المراجعة.
وجهة نظري: قائمة الدخل بقت “مرآة” للتدفقات النقدية
بعد سنين من الشغل مع القوائم المالية، أقدر أقول إن أكبر مكسب حقيقي من IFRS 18 مش إعادة ترتيب البنود.. أكبر مكسب إن قائمة الدخل بقت شبه مرآة لقائمة التدفقات النقدية: تشغيلي قصاد تشغيلي، استثماري قصاد استثماري، تمويلي قصاد تمويلي. وده مش صدفة — المعيار اتطلع ومعاه تعديل في معيار التدفقات النقدية (IAS 7) خلّى الطريقة غير المباشرة تبدأ من الربح التشغيلي، وثبّت تبويب الفوايد والتوزيعات.
| الفئة | في قائمة الدخل | نظيرها في التدفقات النقدية |
|---|---|---|
| تشغيلي | الإيرادات والمصروفات التشغيلية ← الربح التشغيلي | المتحصلات والمدفوعات التشغيلية ← صافي التدفق التشغيلي |
| استثماري | نصيب الشقيقة، إيجار المخزن، عوائد الودائع | توزيعات وفوايد محصّلة، شراء وبيع استثمارات |
| تمويلي | فوايد القروض وفروق عملتها | القروض المستلمة والمسددة، الفوايد المدفوعة |
ومعنى كده إننا هنبدأ نحل الإشكال اللي واجه كل مدير مالي تقريباً: “إزاي أنا عامل ربح على الورق.. ومش لاقي الفلوس؟” الفرق بين ربح تشغيلي حقيقي وربح متأثر بتمويل أو توسّع هيبان بوضوح. قائمة الدخل الجديدة مش بس بتقولك كسبت كام.. بتقرّبك من السؤال الأخطر: الفلوس دي جات منين.. ورايحة فين؟
— أكرم ممدوح
التقويم العكسي: إحنا فين النهارده؟
المعيار بيتطبق بأثر رجعي، فأرقام سنة المقارنة لازم تتعاد بالشكل الجديد. لشركة سنتها المالية بتنتهي 31 ديسمبر:
- 2025 — التوقيت المثالي اللي أدلة التطبيق كانت بتنادي بيه: تقييم الفجوة، تحديث الـ ERP، تعديل شجرة الحسابات، تحديد الـ MPMs، تدريب الفريق، وتشغيل موازي. الشركات اللي بدأت فيه دخلت سنة المقارنة وأنظمتها جاهزة.
- 01-01-2026 — بداية سنة المقارنة. أي قيد من اليوم ده هيتعرض بعدين بالهيكل الجديد.
- سبتمبر 2026 — إحنا هنا. عدّى 9 شهور من سنة المقارنة. لو ما بدأتش في 2025، الوقت اتأخر بس لسه ممكن: ابدأ التصنيف الجديد في الربع الأخير، وارجع صنّف يناير–سبتمبر من الأستاذ العام قبل ما التفاصيل تضيع. كل شهر تأجيل = شهر زيادة شغل يدوي في إعادة التبويب.
- 31-12-2026 — قفل سنة المقارنة (آخر قوائم منشورة بـ IAS 1).
- 01-01-2027 — السريان الإلزامي.
- 31-03-2027 — أول قوائم ربع سنوية (للشركات اللي بتصدر مرحلية) ومعاها الربع الأول 2026 معاد عرضه.
- 31-12-2027 — أول قوائم سنوية كاملة بالمعيار، ومعاها تسوية لكل بند في قائمة الدخل بين رقم 2026 المعاد عرضه والرقم اللي اتنشر قبل كده.
5 قرارات على مكتبك
النشاط الرئيسي
اجتماع مع الإدارة العليا لتحديد النشاط المولّد للإيراد وتوثيقه بأدلة (هل الاستثمار أو التمويل جزء من نشاطنا الأساسي؟).
طبيعة ولا وظيفة؟
عرض المصروفات بالوظيفة (تكلفة مبيعات، بيع، إدارية) بيلزمك بإيضاح إضافي بيفك 5 أنواع بطبيعتها. القرار ده بيحدد حجم الشغل التحليلي.
قائمة الـ MPMs
إيه المؤشرات اللي هنكمّل نعلنها؟ مين مسؤول عن حسابها؟ وإيه أدلة الإثبات اللي هتتقدم للمراجع؟
ميزانية الأنظمة
تعديل شجرة الحسابات والـ ERP مش ببلاش. اعتمد ميزانية ووقت مع إدارة تكنولوجيا المعلومات دلوقتي، مش في ديسمبر.
التواصل الخارجي
البنوك، مجلس الإدارة، المستثمرين: جهّز رسالة واضحة تشرح ليه “الربح التشغيلي” اتغير وصافي الربح لأ.
قائمة مراجعة المدير المالي
- تحديد وتوثيق النشاط الرئيسي للشركة بقرار مكتوب.
- مسودة أولية (Initial Draft) لقوائم 2025 أو 9 شهور 2026 بالشكل الجديد لقياس حجم الفجوة الحقيقي.
- حصر عقود القروض والحوافز المربوطة بالربح التشغيلي أو EBITDA وتقدير الأثر.
- حصر مؤشرات الإدارة المعلنة وقرار بشأن كل واحد.
- اجتماع مع إدارة تكنولوجيا المعلومات: شجرة حسابات جديدة + ربط فروق العملة بأصل المعاملة + تحليل المصروفات المزدوج.
- تحديد مين في الفريق مسؤول عن إعادة تبويب سنة المقارنة 2026.
- التنسيق المبكر مع مراقب الحسابات على التصنيفات والاجتهادات.
- خطة تدريب للمحاسبين على منطق التصنيف الجديد.
الخلاصة: هتحكي قصة شركتك إزاي؟
قوة بشرط الشفافية
المعيار بيديك الحق تعرض مقاييسك اللي بتحكي أداءك الحقيقي.. بس بشفافية هيكلية كاملة وتسوية ومراجعة.
نظّف مقبرة “أخرى”
جهّز إيضاحاتك التحليلية، وما تستخبّاش ورا حجة “التكلفة والجهد المفرط” — المراجعين هيرفضوها.
الأنظمة هي المشروع الحقيقي
مش تسويات محاسبية آخر السنة. لو اعتبرته مهمة ختامية لفريق التقارير، أنظمتك المالية هتنهار تحت ضغط سنة المقارنة.
7 مهام عملية بالقيود وشجرة الحسابات ومثال كامل بالأرقام — ابعته لفريقك.
© فيتامين محاسبة