فيتامين محاسبة · للمحاسب المالي

IFRS 18 للمحاسب المالي:
7 مهام تبدأ من شجرة الحسابات

الدليل العملي للتجهيز لقائمة الدخل الجديدة — بالقيود، والأكواد، ومثال كامل بالأرقام، وتمرين تختبر بيه نفسك.

دليل فيتامين محاسبة لإعداد القوائم المالية · قائمة الدخل

قبل ما تبدأ

المعيار بيسري على السنوات اللي بتبدأ من 1-1-2027، وأرقام 2026 (السنة الحالية) هتتعاد بالشكل الجديد كأرقام مقارنة.
يعني كل قيد بتسجله النهارده هيتعرض بعدين بالتصنيف الجديد. لو القيد مش شايل المعلومة (فرق العملة ده جاي منين؟ المصروف ده طبيعته إيه؟) هتضطر ترجع للمستندات واحد واحد.
شغلك مش “تغيير ترتيب القائمة”.. شغلك إن كل حساب في الشجرة يعرف هو رايح فين.

الخريطة في سطرين

كل إيراد ومصروف في قائمة الدخل بيروح لواحدة من الفئات دي: تشغيلي استثماري تمويلي ضرايب عمليات متوقفة — وبعد التشغيلي بييجي مجموع إلزامي اسمه الربح التشغيلي، وبعد الاستثماري مجموع إلزامي اسمه الربح قبل التمويل والضرائب.

مصفوفة التحول: إيه اللي هيتغير فعلاً في يومياتك؟

البند	IAS 1 (القديم)	IFRS 18 (الجديد)
هيكل قائمة الدخل	مرن، من غير فئات إلزامية	3 فئات صارمة (تشغيلي، استثماري، تمويلي) + مجموعين إلزاميين
بند “أخرى”	صندوق أسود لدفن المصروفات اللي ملهاش مكان	ممنوع الغموض: تسمية وتفصيل، وإيضاح لو المجموع كبير
فروق العملة	بتتجمع في حساب واحد للسهولة	تتبع “جذر” المعاملة (تشغيلي أو استثماري أو تمويلي)
مقاييس الإدارة (MPMs)	برا القوائم (في تقرير مجلس الإدارة)	جوه الإيضاحات وتحت مراجعة مراقب الحسابات

حدد “النشاط الرئيسي” قبل أي تصنيف

التصنيف كله بيبدأ من سؤال: الشركة دي شغلتها إيه؟ (Main Business Activity). نفس البند بيتنقل من فئة لفئة حسب الإجابة:

نوع الشركة	عوائد الودائع والاستثمارات	فوايد القروض
شركة صناعية أو تجارية	استثماري	تمويلي
شركة استثمار عقاري (إيجار العقارات هو شغلها)	إيجار العقارات تشغيلي	تمويلي
بنك	تشغيلي	تشغيلي
شركة تأجير تمويلي / تمويل عملاء	حسب النشاط	تشغيلي بالقدر المرتبط بتمويل العملاء (خيار سياسة محاسبية)

تلميح: اللي “تمويلي” عند شركة عادية.. “تشغيلي” عند بنك المعيار بيسمي الحالات دي أنشطة رئيسية محددة (Specified Main Business Activities – SBMAs): الاستثمار في أصول معينة، أو تقديم تمويل للعملاء. لو شركتك التجارية عندها ذراع بيع بالتقسيط جوهري، فإيراد فوايد التقسيط تشغيلي، وتختار سياسة محاسبية لتكلفة التمويل المرتبطة بيه.

لو شغال في مجموعة شركات النشاط الرئيسي بيتحدد على مستوى الكيان اللي بيعرض القوائم. إيجار تابعة عقارية = تشغيلي في قوائمها المستقلة، لكن في القوائم المجمعة لمجموعة صناعية ممكن يبقى استثماري. يعني ورقة التجميع محتاجة عمود “إعادة تصنيف”.

دورك: متسجلش تصنيف “على مزاجك”. اطلب قرار مكتوب من الإدارة بالنشاط الرئيسي، واحفظه في ملف المراجعة — مراقب الحسابات هيطلبه.

صنّف كل بند في صندوق من التلاتة

اسأل الأسئلة دي بالترتيب لكل حساب في الشجرة:

البند ده جزء من النشاط الرئيسي؟ ← تشغيلي
جاي من شركة شقيقة أو مشروع مشترك أو تابعة غير مجمعة، أو من النقدية وما في حكمها، أو من أصل بيدر عائد لوحده بعيد عن باقي موارد الشركة (عقار استثماري، أسهم)؟ ← استثماري
جاي من التزام هدفه جمع تمويل (قرض، سندات)، أو هو فوايد التزام تاني (فوايد التزام إيجار، فك خصم مخصص طويل الأجل)؟ ← تمويلي
مفيش ولا حاجة من اللي فوق؟ ← تشغيلي (الفئة التشغيلية هي “الوعاء المتبقي”)

القاعدة الذهبية: اجمع المتشابه وافصل المختلف المعيار بيطلب تجميع البنود حسب الخصائص المشتركة وتفصيل البنود المختلفة (Aggregation & Disaggregation). مثال: الموردين العاديين لازم ينفصلوا عن الموردين اللي داخلين في ترتيبات تمويل موردين / تخصيم عكسي (Reverse Factoring) — لأن طبيعتهم مختلفة حتى لو الاتنين “دائنين”.

فكّك لغم بند “أخرى”

“مصروفات أخرى” كانت الصندوق الأسود اللي بندفن فيه أي حاجة مش عارفين نحطها فين. مع IFRS 18 ده انتهى: تسمية “أخرى” مسموحة بس لما مفيش اسم أوضح، ولو المجموع كبير لازم إيضاح يشرح مكوّناته.

شجرة القرار لأي بندين قدامك:

س1: البنود دي متشابهة في طبيعتها؟

نعم

ادمجها في بند واحد.

لا

روح للسؤال التاني ↓

س2: دمجها بيسهّل قراءة القائمة؟

نعم

ادمجها في صلب القائمة، لكن فصّلها في الإيضاحات.

لا

افصلها على وش القائمة كل بند في سطر.

تطبيق عملي (معصرة الجبل الأخضر): حساب “مصروفات أخرى” رصيده 250,000 جنيه. افتح الحساب وافحص الطبيعة:

المكوّن	المبلغ	المعالجة
قضايا عملاء يومية (نزاعات تحصيل وضمان)	70,000	تشغيلي في سطر “مصروفات قضايا عملاء”
تكاليف افتتاح معرض القاهرة (دعاية افتتاح، تدريب عمالة، تشغيل تجريبي)	130,000	تشغيلي لكن في سطر منفصل لاختلاف طبيعته
مصروفات متنوعة صغيرة	50,000	تفضل “مصروفات تشغيلية أخرى” مع إيضاح بمكوناتها لو المجموع مهم

خد بالك فصل تكاليف المعرض (أو إعادة الهيكلة) مش معناه إنها تخرج من الفئة التشغيلية. المعرض توسّع في النشاط الأساسي نفسه. الفصل هنا فصل عرض (سطر مستقل)، مش نقل فئة.

تتبّع “جذور” فروق العملة

زمان: كل فروق العملة في حساب واحد مريح. دلوقتي: فرق العملة بيتبع الفئة اللي فيها البند اللي طلّعه. فرق عملة قرض دولاري = تمويلي. فرق عملة مورد أجنبي = تشغيلي. فرق عملة وديعة دولارية = استثماري.

المعصرة عندها خسارة فروق عملة 150,000 جنيه آخر السنة: 90,000 منها على القرض الدولاري لخط العصر، و60,000 على موردين قطع الغيار الإيطاليين. القيد الصح من الأول:

من ح/ فروق عملة – قروض (تمويلي) 90,000 إلى ح/ قروض بالعملة الأجنبية 90,000 إعادة تقييم رصيد القرض الدولاري في نهاية الفترة

من ح/ فروق عملة – موردين وعملاء (تشغيلي) 60,000 إلى ح/ موردين أجانب 60,000 إعادة تقييم أرصدة الموردين الأجانب في نهاية الفترة

تنبيه أنظمة المعيار فيه إعفاء لو الفصل هيكلف “تكلفة أو مجهود مبالغ فيه” (Undue cost or effort)، لكن إثباته للمراجع صعب جداً. الحل: النظام نفسه يربط قيد إعادة التقييم بحساب الأصل أو الالتزام تلقائياً. وافصل كمان المحقق عن غير المحقق (Realized vs. Unrealized) في حسابين.

طبيعة ولا وظيفة؟ واستعد لـ “الإيضاح الموحد”

عرض المصروفات بالطبيعة (إهلاك، أجور، مواد) مباشر ومفيش عليه متطلب إضافي. لكن لو الشركة بتعرض بالوظيفة (تكلفة مبيعات، بيع وتوزيع، إدارية) أو بأسلوب مختلط، المعيار بيلزمك بإيضاح واحد (Single Note) بيفك 5 أنواع بطبيعتها ويوريك كل نوع موزع على أنهي سطر:

الطبيعة	تكلفة المبيعات	بيع وتوزيع	إدارية	الإجمالي
الإهلاك	300,000	50,000	100,000	450,000
الاستهلاك (أصول غير ملموسة)	—	—	40,000	40,000
مزايا العاملين	600,000	350,000	250,000	1,200,000
خسائر اضمحلال الأصول	—	—	25,000	25,000
تخفيض المخزون لصافي القيمة البيعية	35,000	—	—	35,000

المطلوب فنياً: كل قيد مصروف لازم يشيل بُعدين: الطبيعة (الحساب نفسه) والوظيفة (مركز التكلفة). لو نظامك بيسجل الأجور كلها في حساب واحد من غير مركز تكلفة، الإيضاح ده هيبقى مستحيل من غير شغل يدوي ضخم.

جهّز ورقة عمل مؤشرات الإدارة (MPMs)

الأول افهم خريطة المجاميع الفرعية في القائمة الجديدة:

النوع	أمثلة	المطلوب
1. إلزامية (Required)	الربح التشغيلي، الربح قبل التمويل والضرائب	لازم يظهروا، من غير نقاش
2. متعارف عليها (Common)	مجمل الربح	مسموح بيها كعُرف محاسبي، من غير شروط MPM
3. إضافية (MPMs)	الربح قبل مصاريف البحث، الربح المعدَّل	تعريف + تسوية + أثر ضريبي + مراجعة

مؤشرات زي “الربح التشغيلي المعدَّل” اللي الإدارة بتعلنها بقت داخل الإيضاحات وتحت المراجعة. دورك كمحاسب: ورقة عمل لكل مؤشر فيها التسوية مع أقرب مجموع فرعي في المعيار، وأثر الضريبة وأثر الحقوق غير المسيطرة (NCI) لكل بند:

البند	المبلغ	أثر الضريبة (22.5%)	أثر NCI
الربح التشغيلي (حسب IFRS 18)	1,590,000
+ تكاليف افتتاح معرض القاهرة	130,000	(29,250)	0
الربح التشغيلي قبل تكاليف افتتاح الفروع	1,720,000

أثر الضريبة = 130,000 × 22.5% = 29,250. واحفظ مستندات كل رقم في التسوية — دي “المعلومات المعقولة والمؤيدة” (Reasonable & Supportable) اللي المراجع هيطلبها.

الشقيقة والمشروعات المشتركة والتابعة غير المجمعة

القاعدة الصارمة: دخلك ومصروفك من الاستثمار في شركة شقيقة أو مشروع مشترك (بطريقة حقوق الملكية Equity Method) أو تابعة غير مجمعة بيتصنف استثماري — مهما كانت علاقته بالنشاط.

المنطق: المعيار بيعتبرك هنا مستثمر طويل الأجل بتدور على عائد مستقل، مش بتشغّل. وده تغيير مهم لشركات كانت بتحط نصيبها في أرباح الشقيقة جوه “الربح التشغيلي”.

الإجراء: راجع هيكل المجموعة، واعمل حساب مستقل لكل استثمار من دول في الشجرة بتصنيف استثماري.

المثال الكامل: قائمة دخل “معصرة الجبل الأخضر” بالشكل الجديد

معصرة زيتون، نشاطها الرئيسي عصر وبيع الزيت (مش استثمار ولا تمويل)، وبتعرض مصروفاتها بالوظيفة. عندها قرض بنكي دولاري، وقرض حسن من غير فوايد بـ 2 مليون من مورد (اتسدد منه مليون)، ومعرض جديد في القاهرة، وحصة في شركة تعبئة شقيقة:

قائمة الدخل عن السنة المنتهية 31-12-2027	جنيه
الفئة التشغيلية
الإيرادات	10,000,000
تكلفة المبيعات	(6,500,000)
مجمل الربح	3,500,000
مصروفات بيع وتوزيع	(900,000)
مصروفات إدارية	(700,000)
مصروفات قضايا عملاء	(70,000)
تكاليف افتتاح معرض القاهرة	(130,000)
فروق عملة – موردين	(60,000)
مصروفات تشغيلية أخرى (إيضاح)	(50,000)
الربح التشغيلي	1,590,000
الفئة الاستثمارية
نصيب المعصرة في أرباح شركة التعبئة الشقيقة	300,000
إيجار المخزن المؤجر للغير (عقار استثماري)	180,000
عوائد الودائع والنقدية	120,000
الربح قبل التمويل والضرائب	2,190,000
الفئة التمويلية
فوايد القرض البنكي	(340,000)
الفايدة المحسوبة على القرض الحسن	(60,000)
فروق عملة – قروض	(90,000)
الربح قبل ضريبة الدخل	1,700,000
ضريبة الدخل	(382,500)
صافي ربح السنة	1,317,500

راجع بنفسك: 3,500,000 − 900,000 − 700,000 − 70,000 − 130,000 − 60,000 − 50,000 = 1,590,000 ← + 600,000 = 2,190,000 ← − 490,000 = 1,700,000 ← − 382,500 = 1,317,500. نفس صافي الربح اللي كان هيطلع بالعرض القديم بالظبط.

القرض الحسن: ليه فيه “فايدة” وهو من غير فوايد؟ القرض اللي من غير فوايد بيتسجل أول مرة بالقيمة العادلة (القيمة الحالية للسداد) طبقاً لـ IFRS 9، والفرق بيتفك على مدة القرض كمصروف فوايد. الفايدة المحسوبة دي (60,000 في المثال — رقم افتراضي) بتروح تمويلي. أما المليون اللي اتسدد فده سداد أصل قرض: حركة في الميزانية والتدفقات النقدية (تمويلي)، مش مصروف.

شجرة حسابات مقترحة (نموذج)

أسهل طريقة: الكود نفسه يقول الفئة، وتضيف في بطاقة الحساب في النظام حقل “فئة IFRS 18”. مثال لتقسيم حسابات قائمة الدخل:

الكود	الحساب	الفئة
4101	المبيعات	تشغيلي
5101	تكلفة المبيعات (بمراكز تكلفة)	تشغيلي
5301	تكاليف إعادة الهيكلة	تشغيلي
5901	فروق عملة – موردين وعملاء (محققة / غير محققة)	تشغيلي
6101	نصيب في أرباح/خسائر شركات شقيقة	استثماري
6102	عوائد ودائع ونقدية	استثماري
6103	إيرادات عقار استثماري	استثماري
6109	فروق عملة – ودائع واستثمارات	استثماري
7101	فوايد قروض وسندات	تمويلي
7102	فوايد التزامات الإيجار	تمويلي
7103	فك خصم المخصصات طويلة الأجل	تمويلي
7109	فروق عملة – قروض	تمويلي
8101	ضريبة الدخل	ضرايب

القاعدة: كل قيد يتوسم بفئته، مش بطبيعته بس الكود لوحده مش كفاية لو فيه حسابات مشتركة. ضيف في النظام أبعاد تحليلية على مستوى القيد: الفئة (تشغيلي/استثماري/تمويلي) + الوظيفة (مركز التكلفة) + المصدر (الأصل أو الالتزام اللي طلّع فرق العملة). ده اللي هيخليك تقطّع وتحلل البيانات (Slicing & Dicing) وقت ما تحتاج من غير ما ترجع للمستندات.

أجندة اجتماعك العاجل مع إدارة تكنولوجيا المعلومات

✅ هندسة شجرة حسابات جديدة بتدعم الفئات التلاتة بمرونة للتقطيع والتحليل.
✅ محرك فروق العملة: النظام يلتقط فرق العملة ويربطه آلياً بأصل المعاملة (قرض ولا مورد ولا وديعة).
✅ تحليل المصروفات المزدوج: فصل المصروف بطبيعته ووظيفته مع بعض لخدمة الإيضاح الموحد.
✅ تقارير سنة المقارنة: القدرة على إعادة تشغيل أرقام 2026 بالتصنيف الجديد (سنوي وربع سنوي).

والتدفقات النقدية؟ اتغيرت هي كمان

مع IFRS 18 اتعدّل معيار قائمة التدفقات النقدية (IAS 7) عشان القائمتين يتكلموا نفس اللغة:

الطريقة غير المباشرة بقت تبدأ من “الربح التشغيلي” مش من صافي الربح.
للشركات غير المالية: الفوايد المدفوعة ← أنشطة تمويل، والفوايد والتوزيعات المحصّلة ← أنشطة استثمار. الاختيار اللي كان متاح زمان اتقفل.
التوزيعات المدفوعة للمساهمين ← أنشطة تمويل.

وجهة نظري: قائمة الدخل الجديدة بقت شبه “مرآة” للتدفقات النقدية — تشغيلي قصاد تشغيلي، واستثماري قصاد استثماري، وتمويلي قصاد تمويلي. ولأول مرة هتقدر تجاوب بسهولة على سؤال الإدارة: “إحنا كسبنا على الورق.. طب الفلوس فين؟” — أكرم ممدوح

أخطاء شائعة لازم تتجنبها

الخطأ	الصح
تصنيف توزيعات الأرباح (للمساهمين أو حصة مجلس الإدارة المقررة كتوزيع) كبند “تمويلي” في قائمة الدخل	التوزيعات مش مصروف أصلاً — مكانها قائمة التغير في حقوق الملكية، مش قائمة الدخل.
تصنيف تكاليف تجهيز معرض بيع كاستثماري لأن اسمها “تجهيز”	مصروف تسويقي تشغيلي. ولو اتعملت أصول ثابتة للمعرض، إهلاكها تشغيلي برضه.
تصنيف مصاريف الطرح في البورصة كتمويلي في قائمة الدخل	تكلفة إصدار أسهم جديدة بتتخصم من حقوق الملكية مباشرة. الجزء اللي بيتحمل على قائمة الدخل غالباً تشغيلي، لأن الأسهم مش التزام.
نقل تكاليف إعادة الهيكلة لفئة تانية	تفضل تشغيلي في سطر منفصل.
عوائد الودائع عند شركة تجارية “تمويلي”	استثماري — النقدية وما في حكمها استثماري لغير البنوك.
كل فروق العملة في سطر واحد	تتوزع حسب البند اللي طلّعها.

تمرين: صنّف البنود دي

شركة صناعية، نشاطها الرئيسي تصنيع مواد غذائية. فكّر الأول، وبعدين افتح الإجابة:

1. مكسب بيع عربية نقل بضاعة قديمة

تشغيلي — العربية أصل مستخدم في النشاط، مش أصل بيدر عائد مستقل.

2. نصيب الشركة في خسائر شركة شقيقة

استثماري — أي دخل أو خسارة من شقيقة بطريقة حقوق الملكية استثماري.

3. فوايد التزام إيجار مخزن (IFRS 16)

تمويلي — مصروف فوايد على التزام.

4. إيجار محصّل من دور مؤجر لشركة تانية في مبنى الشركة

استثماري — عقار بيدر عائد مستقل عن نشاط التصنيع.

5. خسارة فرق عملة على رصيد عميل في الخارج

تشغيلي — بتتبع رصيد العميل وهو بند تشغيلي.

6. تخفيض مخزون خامات لصافي القيمة البيعية

تشغيلي — ولو العرض بالوظيفة، يظهر في الإيضاح الموحد ضمن الـ 5 أنواع.

7. فروق عملة على قرض يورو لشراء خط إنتاج

تمويلي — مصدرها القرض (التزام هدفه جمع تمويل)، مش خط الإنتاج.

8. توزيعات أرباح نقدية على المساهمين

خارج قائمة الدخل — توزيع على الملاك يظهر في قائمة التغير في حقوق الملكية.

المعرفة تراكمية: 15–30 دقيقة يومياً في أدلة التطبيق هتفرق بين محاسب “بيحفظ القيود” ومحاسب “بيهندس القوائم”.

اقرأ كمان: IFRS 18 للمدير المالي

أثر المعيار على عقود القروض والحوافز ومؤشرات الأداء، و5 قرارات لازم تتاخد دلوقتي.

المصادر: معيار IFRS 18 الصادر عن مجلس معايير المحاسبة الدولية (IASB) والتعديلات المصاحبة على IAS 7؛ والشرح الفني للخبير المحاسبي أ/ أحمد رجب في بودكاست كِناز حول المعيار. الأرقام وأكواد الحسابات نموذجية لأغراض التعليم. المقال لا يغني عن الرجوع لنص المعيار ومراقب الحسابات عند التطبيق.
© فيتامين محاسبة

🔒 الملف والفيديو متاحين للأعضاء — سجّل مجانًا أو ادخل

📊 قيّم المقال وساعدنا نحسن المحتوى